Friðbjörn hélt upp á 49 ára afmælið sitt á tökustað kvikmyndarinnar Legend.

„Ég rak augun í að hann Tom ætlar að halda upp á fimmtugsafmælið sitt á íslandi. Við eigum nefnilega sama afmælisdag sko. Erum báðir alveg blússandi krabbar. Þannig að mér datt í hug að hann gæti bara fengið íbúðina mína í Hraunbænum, haldið bara almennilegt partí þar fyrir vini sína og ég gæti bara farið með kærustuna heim til hans á meðan. Frekar beisikk díll,“ segir Friðbjörn Mapother Bjarnason, sem er strax byrjaður að pakka fyrir ferðina – og hlakkar mikið til.

„Þetta ætti líka að henta honum ágætlega því hann er náttúrulega með nálgunarbann á mig síðan hann var fertugur.

Árni á augljólega ættir að rekja til álfa.

Íslenskir álfar hafa sýnt áhuga á að flytja alþingismanninn Árna Johnsen upp á meginlandið og finna honum stað fyrir framan samskiptamiðsöð álfa og huldufólks á suðurlandi.

Ekki er ljóst hvað álfunum gengur til. Sumir segja þá vilja rækta frændskapinn við Árna, en hann er sem kunnugt er af álfakyni – eins og sjúklegur áhugi hans á grjóti ber vitni um. Aðrir telja að eingöngu sé um svokallað PR-stönt að ræða af hálfu álfanna.

Líklegt er að alþingi taki afstöðu til málsins í vikunni og þá jafnframt hvort gengið verður að kröfum álfannna um að stoppa Árna upp.

Bent kaupmaður ásamt fjölskyldu sinni í verslun sinni í Kringlunni.

Auglýsingaefni frá 18. öld, sem ættað er frá dönskum einokunarkaupmennur hefur fundist á Þjóðskjalasafni Íslands.

Er um að ræða allnokkur veggspjöld með mynd af fjölskyldu kaupmannsins Bent Sívertsen-Jeppesen, undir yfirskriftinni „Hvað höfum vér gjört yður?“

Þá fundust einnig handrit að einþáttungum fyrir leikhús þar sem ábúðamiklir embættismenn lýsa því hvernig skelfilegar náttúruhamfarir, drepsóttir og plágur muni ganga yfir íslenskt samfélag verði einokunarverslunin lögð af.

Þess ber að geta að allt það sem lýst er í auglýsingunum gekk eftir.

Það var kuldalegt um að litast að Bessastöðum í morgun.

Svo virðist sem kuldakastið sem gengur nú yfir landið eigi upptök sín á Bessastöðum, en svo virðist sem forsetinn hafi þar magnað upp gjörningaveður sem lið í kosningabaráttu sinni.

Að sögn gríðarlega hress almannatengils var ákveðið að fara þessa leið til að leggja áherslu á völd og mikilvægi forsetans og hefja kosningabaráttuna með „svolitlu trukki“. Embættið hafi því fest kaup á svokallaðri „veðurvél“ frá velunnurum þess í Asíu.

Munu fleiri aðilar hafa sýnt veðurvélinni mikinn áhuga, ekki síst útgerðamenn, sem sjá í þessu tækifæri til að tengja aftakaveður á Höfuðborgarsvæðinu í sumar beint við aðgerðir ríkisstjórnarinnar.

Jóhannes (gaurinn með gleraugun) ásamt fjölskyldu þegar viðskiptaveldi hans stóð í blóma.

Jóhannes Vilfreðsson, kaupmaður sem oftast er kenndur við vídeóleiguna Bónus-Betu, ætlar sér að opna vídeóleigur hér á landi síðsumars ásamt Malcolm Stalker, forstjóra og stærsta eiganda bresku vídeóleigunnar IceBeta. Frá þessu er greint í Myndbandatíðindum í dag.

„Það lá alltaf í loftinu að koma til baka eftir að mér var bolað út," segir Jóhannes en hann var áður stærsti eigandi Bónus-Betu og VHS-kjara í gegnum fjölskyldufyrirtæki sitt.

Heimildir Baggalúts herma að Jóhannes hyggist leggja áherslu á rómantískar gamanmyndir frá Ameríku og svokallað „Ein ný – tvær gamlar fylgja“ tilboð til að knésetja samkeppnisaðila sína.

Nýi formaðurinn hófst þegar handa við að lesa ársreikning félagsins, sem reyndist þegar upp var staðið vera hljóma- og textablöð við svokallaðan „brekkusöng.“

Nýr formaður hefur verið skipaður í stjórn Þorláksbúðarfélagsins. Honum er ætlað að halda lágmarksbókhald, kaupa blýanta og önnur ritföng „og reyna eftir fremsta megni að fokka ekki upp þeim fáu aurum sem eftir eru af þeim krónum sem félaginu tókst þó að kreista út úr ríkinu af miklu harðfylgi í gegnum klíkuskap,“ eins og það er orðað í tilkynningu frá félaginu.

Síðast sást til mannsins í öryggismyndavélum í garðvörudeild.

Björgunarsveitir úr Reykjavík og Mosfellsbæ leita nú manns sem
týndist í verslunarleiðangri í Bauhaus á laugardag, en hann hugðist kaupa pallaefni og vírnet ásamt ýmiskonar smáverkfærum. Maðurinn er lítt kunnur staðháttum og er óttast að hann hafi mögulega reynt að komast úr garðvörudeild yfir í timburdeild - en það er um tveggja daga gangur.

Maðurinn er illa búinn til verslunarleiðangra - einungis með um kr. 20.000 í reiðufé og ekki með greiðslukort.

Nýi forsetinn þykir bragðdaufari en fyrirrennari hans, en um leið matarmeiri.

Fréttir frá útlöndum herma að Frakkar hafi kosið sér nýjan forseta.

Franska þjóðin hefur löngum verið veik fyrir hvers kyns mat og drykk og oftsinnis hallað sér að matseld þegar á móti blæs. Því kemur það fáum á óvart að Frakkar hafi valið hina ljúffengu Hollandaise sósu til að leiða þjóðina á erfiðum tímum.

Mun þetta vera í fyrsta skipti sem fljótandi frambjóðandi nær kjöri í Frakklandi, en þess má þó geta að fyrirrennari Hollandaise var af flestum talinn alger gufa.

Læknirinn á skurðstofu sinni, sem er í raun smekklega innréttaður bílskúr.

Sjálfstætt starfandi töfralæknir í Vesturbæ Reykjavíkur hefur tekið upp þá nýbreytni að bjóða skjólstæðingum sínum upp á óhefðbundna sjúkdóma.

Hefur þetta slegið í gegn, enda segir hann að fólk sé komið með hundleið á kvefi, mígreni, niðurgangi, brjóstsviða og öðrum gamaldags og hversdagslegum sjúkdómum.

Hann segir að exótískir sjúkdómar á borð við kóleru, hindberjaveiki og hjarðsveinasjúkdóm hafi slegið í gegn. Og á næstunni geti hann jafnvel boðið upp á væga ebólu – „ef apinn sleppur gegnum tollinn“ – eins og hann orðaði það.

Ingileifur hefur ekki borgað tekjuskatt frá árinu 1979 og þannig sparað vinnuveitendum sínum gríðarlegar fjárhæðir í launatengd gjöld.

Ingileifur Ingibergsson forsetaframbjóðandi og fyrrverandi leðuriðnaðarmaður, segist vera reiðubúinn til að vinna svart sem forseti Íslands - nái hann kjöri.

„Jájá. Það er tilboðið mitt. Milljón á mánuði, svart. Þá sleppur ríkið við að borga allskonar launatengd gjöld og ég slepp við skattinn. Allir vinna. Er það ekki eitthvað átak núna?,“ sagði Ingileifur í samtali við Baggalút.